Śląsk Przegięty

Manifest Śląska Przegiętego

1. Śląsk Przegięty je interdycyplinarnym kolektywym a projektym artystyczno-badawczym, kery mo na cylu opowiedzieć queerstorie (w liczbie mnoge) Gōrnego Ślōnska.
2. Korzystajonc z różnych doświadczyń i różnych form chcymy dać wyraz tymu, co od wielu lot je u nas przemilczane a zawsze tuky było. Chcymy stworzyć przegiynte archiwum (patrz: Foucault) przegiyntego Ślōnska. Chcymy upomnieć sie o osoby przegiynte, wykluczone, niewygodne, kerych nie znejdziecie na hipster-Ślōnsku spod znaku „Nowych Ślązaków”.
3. Ślōnsko godka je podstawowym jynzykym, w kerym sie komunikujymy, bo je to jynzyk w same swoje strukturze i uzusie queerowy. Ni mo jednej wersji, kożdo używo go po swojimu i tak powinno zostać. Bestoż nie używomy ślabikorza, kery je odgornie narzuconym systymym, tłamszoncym tyn queerowy potyncjał ślōnske godki (chocioż ślabikorza też sie nie bojimy, wiync czasym możecie go kajś obaczyć).
4. W podyjściu do jynzyka wierzimy przegjyntymu filozofowi Ludwigowi Wittgensteinowi, kery powiedzioł, że granice naszego jynzyka som granicami naszego świata. Chcymy te granice rozszyrzać na dwa sposoby:
   a) Wprowadzajonc ślōnsko godka w dyskurs queerowy. Polski queer mo wielki problym z jynzykym, kerym sie posługuje. Wierzimy, że ślōnsko godka może to zmjynić.
   b) Zaczynajonc używać ślōnske godki do godania o poważnych i wspołczesnych rzeczach. Fest nas irytuje to, że ślōnsko godka traktowano je jako śmiyszno per se i sprowadzano do zabawnych haseł na koszulkach i inkszych głupot. My bydziymy używać ji na poważnie.
5. Wychodzonc od doświadczynia jynzykowego, przeciwstawiomy sie unifikacji doświadczynia ślōnskości, jak i doświadczynia nieheteroseksualności. Jak młotek z pyrlikym krziżujymy nasze przegiyntości z naszymi lokalnymi tożsamościami.
6. Tworzymy wspólnota i bezpieczniejszo przestrzyń korzystając z już istniejących sieci wsparcia. Nie wyważomy otwartych dźwiyrzi, poszukujymy sojuszy i nie robimy na nowo tego, co już zrobiyli inni. Wierziymy we wspólpraca a niy konkuryncjo.
7. Na Ślōnsku Przegjyntym wszytke osoby som mile widziane. Pod warunkym, że też mile widzom wszystkich. Oznaczo to też, że projekt je otwarty na osoby, kere chciałyby pod flagom Ślōnska Przegiyntego coś zrobić – razym abo same. Ni musicie godać po ślōnsku, żeby przeginać Ślōnsk.